କନ୍ଧେନଝୁଲାରେ ବେଆଇନ କ୍ରସର, ସବୁ ଜାଣି ପ୍ରଶାସନ ଚୁପ୍

ପାଟଣାଗଡ: ବଲାଙ୍ଗିର ଜିଲ୍ଲା ବେଲପଡା ବ୍ଲକ୍ କନ୍ଧେନଝୁଲା ଗାଁରେ ବେଆଇନ କ୍ରସର ଚାଲିଛି I ଦୀର୍ଘ 8 ମାସ ହେଲା ପ୍ରଦୂଷଣ ସାଟିର୍ଫିକେଟ ନଥାଇ ରାସ୍ତା ପାର୍ଶ୍ୱରେ ଏହି ବେଆଇନ କ୍ରସର ଚାଲିଥିବାରୁ ରାସ୍ତାଘାଟ ଖରାପ ହେବା ସହ ଚାଷୀଙ୍କ ଫସଲ ବି କ୍ଷତି ହେଉଛି l ଗାଁ ନିକଟରେ ଥିବା ଏହି କ୍ରସର୍ ରାସ୍ତା ପାର୍ଶ୍ୱରେ ରହିଛି I ଏପରିକି ରାସ୍ତାର 5 ଶହ ମିଟର ଦୂରରେ କ୍ରସର ୟୁନିଟ ରହିବାର ନିୟମ ରହିଥିଲେ ବି ଏଠାରେ ତାହା ଉଲ୍ଲଂଘନ କରାଯାଇଛି l ଫଳରେ ଗାଁ ଲୋକେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି I
ଏନେଇ ଗାଁ ଲୋକେ ବାରମ୍ବାର ଅଭିଯୋଗ କରୁଥିଲେ ବି ତାଙ୍କ କଥା କେହି ଶୁଣୁନାହାନ୍ତି l ଏନେଇ ସ୍ଥାନୀୟ ତହସିଲଦାର ଅଭିଷେକ କିଷାନ କହିଛନ୍ତି, ଜନବସତି ଦୂରେ କ୍ରସର ରହିବା ସହ ପ୍ରଦୂଷଣ ସାର୍ଟିଫିକେଟ୍ ଥିବା ନିହାତି ଜରୁରୀ l କିନ୍ତୁ ଏହାର ମାସ ମାସ ହେଲା ପ୍ରଦୂଷଣ ସାର୍ଟିଫିକେଟ ନଥାଇ ଏଠି ବେଆଇନ କ୍ରସର୍ ଚାଲିଛି l

ସେପଟେ କନ୍ଧେନଝୁଲା ଗାଁରେ ଚାଲିଥିବା ବେଆଇନ କ୍ରସରର ତଦନ୍ତ ପାଇଁ ସ୍ଥାନୀୟ ତହସିଲଦାରଙ୍କୁ ପାଟଣାଗଡ ଉପଜିଲ୍ଲାପାଳ ସୁନୀଲ ମେହେର ଦେଇଥିବା ନିର୍ଦ୍ଦେଶକୁ ଅନେକ ଦିନ ବିତିଗଲାଣି l ଅଭିଯୋଗର ତୁରନ୍ତ ତଦନ୍ତ କରିବା ସହ ପ୍ରଦୂଷଣ ସାର୍ଟିଫିକେଟ୍ ସହ ଆବଶ୍ୟକୀୟ କାଗଜପତ୍ର ଦେଖାଇବା ପାଇଁ ବି କୁହାଯାଇଥିଲା l ଏପରିକି ନିୟମ ଉଲ୍ଲଂଘନ କରି କ୍ରସର ଚାଲିଥିବା ଜଣାପଡ଼ିଲେ ସମ୍ପୃକ୍ତ ମାଲିକ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବାକୁ କହିଥିଲେ ଉପଜିଲ୍ଲାପାଳ ସୁନୀଲ ମେହେର l ହେଲେ ଏଯାଏ କ୍ରସର୍ ମାଲିକ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ l ଅନ୍ୟପଟେ କ୍ରସରର ଅନେକ ମାସ ହେଲା ପ୍ରଦୂଷଣ ସାର୍ଟିଫିକେଟ୍ ଶେଷ ହୋଇ ଯାଇଥିବା ଜଣାପଡ଼ିଛି l ଏ କଥାକୁ ସ୍ଵୀକାର ବି କରିଛନ୍ତି ବଲାଙ୍ଗିର ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଂଚଳିକ ଅଧିକାରୀ ବବିତା ସିଂହ l ଏଠି ପ୍ରଶ୍ନ ଉଠୁଛି, ଦୀର୍ଘ ମାସ ହେଲା ବିନା ପ୍ରଦୂଷଣ ସାର୍ଟିଫିକେଟରେ କେମିତି ଚାଲିଛି କନ୍ଧେନଝୁଲାର କ୍ରସର୍ l ସବୁ ଜାଣି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନଥିବାରୁ ବିଭାଗୀୟ ଅଧିକାରୀ ଓ କ୍ରସର ମାଲିକର ମଧୁଚନ୍ଦ୍ରିକା ଥିବା ସ୍ପଷ୍ଟ ବାରି ହୋଇପଡ଼ୁଛି l ତେବେ ଦେଖାଯାଉ ଏହି ବେଆଇନ କ୍ରସର୍ ଉପରେ ପ୍ରସାଶନ କି ପ୍ରକାର ପଦକ୍ଷେପ ଗ୍ରହଣ କରୁଛି l